Bujakng Nyangko

Ka’ Radakng ka’ kampokng Angus, idup saeko’ dara nang dah tuha damanya Dayakng Gulinatn. Ia idup babaro, adi’ baradi’nya dah manyak nang panganten ka’ kampokng ngian. Ka’ sote’ malam ia bamimpi dingatakngi seko’ bujakng nang baik atinya. Bujakng koa lumpat ka’ langit, man takiji’ ka’ ia. Nyamare’atn kokotnya ka’ dayakng Gulinatn.
“ Sae damanyu? “ Janya.
“Aku Dayakng Gulinatn, sae ge’ kita’?”
“Santak Mataari dari Sapangko Kanayatn”
Sirage bujakng tadi nyabutatn damanya, ujatn aya’ turutn man late’. Dayakng Gulinatn takajut. Ia nau’an kade’ dah bamimpi dingatakngi bujakng tarigas.
“Sidi gagasa’ idupku ngian kade’ ia jaji kasihku” ja Dayakng Gulinatn.

Ampaginya ia takanang agi’ man bujakng koa. Na’ ada nang ia mikiri’, makin reho atinya man mimpinya koa. Biar ina’ panganten, ia babuntikng.
“dono’… aku babuntikng?” janya sambil ngeak kagali’anan ba dangan man nana’ nau’an sae apa’ kamuda’nya koa. Biar leakoa ia pihara buntikngnya. Sambilan bulatn sapuluh ari lahir uga’ kamuda’ koa sirage man ujatn aya’ ba late’ ngantak. Ujatn ngian bai’ baranti, makin ari makin miah darasnya.

Urakng sakampokng bakomo’ mapakatatn ahe nang mao’ dipanjoat jukut ujatn bai’ baranti.
“ Au’nya ada sote’ pakara ka’ kampokng diri’ ngian “ ja urakng tuha nang ngapalai’ bakomo’ koa
“ Au’ dara nang lain ngalahiratn tapi na’ lea Dayakng Gulinatn. Antah ngahe ujatn bai baranti..” ja seko’ nang lain.
“ Kade’ lea ngian tanya’an ka’ Dayakng Gulinatn….” Ja ayukngnya nang lain.
“Ame, ana na’ nyaman ba kampokng sabalah… nyaman diri’ notokng. Sae nau’an kapala kayo nang di nyimpan ka’ tingaatn rumah koa bera ka’ diri’” ja kapala komo’ tadi.
“Au’lah kade’ lekoa panjoat ampeatn paraga notokng koa.”
“ Je’ lah……” ja nang lain.
Malam koa uga’ di milihi’ sigana dangan nang ngurusi’ adat notokng koa. Tuha muda’ aya’ enek, laki binian, manto nyiapatn adat notokng. Tampatnya ka’ laman radakng. Laka’ notokng ujatn masih bai’ baranti. Dayakng Gulinatn pun nana’ katele’atn ka’ acara koa.
“Coba incakng Dayakng Gulinatn ka’ kea boh Palapi”
“Au’” ja Palapi sirage mulakngi’ Dayakng Gulinatn. Gulinatn kaluas dari kilamunya, bakomo’ man dangan ka’ adat koa. Supe’ supe’ ia nari ngakeser barrage dangan sakampokng. Lupa Ia kade’ kamuda’nya nya ningalatn ka’ kilamu. Samuanya repo nele’ kapanean Dayakng Gulinatn nari. Ujatnpun baranti, baganti man darakng ( ujatn darakng ).

Nele’ kapanean dayakng gulinatn, santak mataari gangatar dalapm atinya. Ia dah ngidaman ihanya ka’ dayakang gulinatn kaluar dari kilamunya. Ia ngian maok ngicaknga’ dayakng gulinatn ka’ nagarinya, nang badama sapangko. Pas dayakng gulinatn ina’ nauan, santak mataari naap ia lalu nya ngicakng tarabakng ka sapangko.

Nele’ dayakang gulinatn dinaap, urakng kampokng bera. Palapi nyambar mandonya, ngibasa’ santak mataari. Nele’ leakoa, santak mataari dari, tarabakng. Ia ina’ jadi ditaap.

Aka’ dayakng gulinatn ngampusi’ ambeknya, gali’ ia ditaap uga’. Ambeknya ngian nya mihara gagas-gagas. Dah sangahe ari, ia batalah. Nya nalah nyangko kamenakatnya koa. Kasih sidi ia ka kamuda’ koa, gi’ enek dah inak bauwe’. Urakng kampokng repo ka nyangko, jukut pane tarabakng man rehatn kokot. Ia ina’ repo nele’ urakng kampokngnya kodo. Sangahe kali kampokngnya dinyarakng kayo, nyangko nyalamatatn man baasil ngusir kayo. Repo urakng kampokng ka ia batambah. Salama lima balas tahutn ia mihara anak dayakng gulinatn. Nele’ kamenakatnya dah aya’, nu’ tuhanya bacurita kade’ uwe’nya dinaap urakng sapangko. “ sabanarnya kao ada ba uwe’. Apa’ nyu aku ugak ina’ nau’an “ nu’ tuhanya mulai’ bacurita. “ saat kao dimaranakatn, ari ujatn tarus-manarus, siakng ari malaman. Nele’ lea koa, urakng kampokng ngadaatn adat notokng. Samua banariatn, uwe’ nyu uga’. Karepoatn nari, ia ina’ sadar kade’ ada nang maok nabanana’nya. Ia dinabanan santak mataari ka sapangko “ curita nu’ tuhanya ka anak dayakng gulinatn.

Nangar curita koa, nyangko maok ngampusia’ uwe’nya. Mao’ sidi ia batamua’ ba ia. Nya matakatn niatnya ngian ka nu tuhanya. “ sampe dimae aku tatap ampusa’ ka sapangko, ngampusia’ uwe’ku “ janya babatak.

“ kamile ba kao ampusa’’ “, ja nu tuhanya batanya’.
“ ampagi alapm ” ja nyangko.

Alapm-alapm, nu tuhanya dah nyiapatn bahata nyangko. Nele’ dah siap, nyangko tarabakng ka sapangko. Sakali nangkot, ia dah sampe ka sapangko.

Santak mataari ngaruah pumputn, manyakng sidi ia namu ikatn. Satingkalakng ikatnya nya ngicakng pulakng. Karepoatn, ia kalupaatn ka urakng tumpuk. Ia ina’ nau’an nyangko dah atakng katumpuknya ngampusi’ uwe’nya.
Uwe’ nya takajut nau’an ada kamuda’ ampus ka ia. “ sae kao ngian ? “ janya batanya’. “ aku nyangko “ ja kamuda’ koa. Aku ampusa’ ka uwe’ku. Dah lama kami ina’ batamu. Jan nyangko.
“ sae uwe’nyu koa “ tanya’ nang bini koa.
“ damanya dayakng gulinatn, ia de’e dinabanan santak mataari “ ja nyangko agi’.
“ o..kade’ leakoa, akulah uwe’nyu koa “ ja nang bini koa.
Nauan dah batamu ba uwe’nya, nyangko nangis. Uwe’nya nangis ugak. Nya dua ngeak. Dah lakak ngeak, nyangko batanya’ ka we’nya.
“ ka’mae pa’ku ? “
“ ia ampus ngawah pumputn. Sabantar agi’ ia pulakng “ ja we’nya.

Dah atakng ka tanga’ tumpuknya, ia nele ada urakng barahu, gik muda’ sidi.

“ ngahe kita’ keatn ? “ janya batanya’.
“ aku ngampusi’ apa’ku man uwe’ku “ ja nyangko.
“ eee..nangkoalah apa’nyu “ ja dayakng gulinatn babatak ka nyangko.
“ ame doho’. Sae ge’ kamuda’ ngian? Ame pucaya’ doho’ “ ja santak mataari ka’ bininya. Manas ia kabininya kalamun pucaya’ ka urakng barahu dinganal.

“ o..ia ngian anakku nang kuningalatn dee ka dalapm kilamu. Aku gik nape’ sampat naapnya, kao dah naikatn aku ka keatn “ ja dayakng gulinatn.

“ kadek leakoa, gagaslah. Diri’ barajaki ugak batamu ba ia . E.. Kao, nyangko, makatn boh ikatn ngian kade kao batol anakku “ ja santak mataari nele nyangko. Nyanaap ikatn patukng nang ayaknya ampat jari’. “ ngian, talatn bolat “ janya. Ia maok munuha’ nyangko.

Nyangko naap ikatn patukng koa, nya nalatn. Nalos. Ua’ ngian ikatn patukng. Nalos. Da’ paknya ngelengan kapala nele’ nyangko labih pane darinya..

“ kade’ leakoa, kao batol anakku “ janya. Lalu nya nyuruh nyangko mabala ikatn nang nya namu. Uwe’nya tukang suman. Dah masak, ikatn nya makatn batiga. Dah laka’ makatn, “ ampagi dirik mantokng lintongan “ ja kata paknya nele nyangko.
“ au’ lah “ ja nyangko.

Nyangko singaja nya maba ka tampat tadukng nang ayak ransukng. Nyangko inak nauan ka rancana apaknya. Jadi iapun mao’ maan ampus. Ka maraga, apa’nya doho’ bajalatn. Nyangko namui’ manyak sidi tadukng nang ayak-ayak nya nyahuru. Apaknya karepoatn, mati kao nyangkoa ja paknya kadalam ati. Tadukng nang sidi aya’ bakata ka nyangko “ kao ame gali’ ka dian boh nyangko “. Ja tadukng koa.
“ auk lah..” Ja nyangko.
Nyangko nya mare’ saconekng panawar racutn.
Dah lama bajalatn, nya nelek nyangko inak diahe-ahe. Sabantar-sabantar nyamaleki’ anaknya koa. dingelengan kapala agi’ di pa’nya. O..janya, ngian ina’ batol. Kade’ leakoa, ampagi kubaba ka sarakng legoh ia, ja paknya dalapm ati.

Dah atakng katumpuk, apaknya babatak kabininya.
“ ampagi kami badua ampus bajalatn agik. Kunele’, anak diri’ koa repo bajalatn ka abut-abut “ ja santak mataari nele’ bininya.
“ kade’ gagas, ampuslah. Ati-ati maan “ ja bininya.

Ampaginya, nyangko dipa’nya maba agi’ bajalatn. “ diri’ ngago’ karake’ . Pula’ karake’ koa ada ka sarakng legoh. Kao barani naapnya ? “ janya ka nyangko. “ auklah, aku barani “ ja nyangko.
Dah atakng ka tea’ karake’, nyangko nele’ manyak legoh nang garang, aya’ agi’nya. Pane nya rantak aku, ja dalapm ati nyangko. Apa’nya mikiri’, nyangko mati diramuk legoh. Ahe agik ia atakng kasarakngnya. Ngatangan gigi kapangorek , ja dalapm ati paknya.

Ina’ nya nyangka, legoh repo ugak ka nyangko. “ ame kao gali’ boh, nyangko. Kami ina’ ngahe-ngaheatn kao “ ja kata legoh nang sidi aya’.

Nele’ lea koa, apa’nya ngelengan kapalanya agi’. Inge nyangko dah barinsi’, lalu nya maba apa’nya pulakng.
Dah atakng katumpuk, apa’nya bakata ka nyangko “ ampagi dirik ngago’ gamer boh “ . Uwe’nya dah ngarati ka dalapm ati lakinya. Ia bakata ka nyangko. Ati-ati boh nyangko. Nau’an leakoa, nyangko mangap. Karana ia barani, ia repo maan dimaba apaknya naiki’ gamer ka pucuk binuang nang ada uanyi’nya.

Alapm-alapm apa’nya dah ngalumpatatn nyangko. Nya dua bajalatn ka’ udas nang manyak uanyi’nya. Nya nele ka pucuk binuang nang sidi tingi ada gamer nang gagas. “ kao naik boh, apa’ nunggu ka babah “ ja paknya nele nyangko. Nyangko nuruti’ kata apa’nya. Ia naik maan ka pucuk binuang ngkoa. Dah atakng kapucuk, uanyi’ bakata “ kao ame gali’ ka kami boh, nyangko. Kami inak ngarusuhi’ kao. Ngian aku marek pihamakng naik “ ja uanyi nang aya’.

Nele’ ina’ ahe-ahe, apaknya sakali agik ngelengan kapala. Jago sidi kamuda’ ngian. Ampahe agi’ kanyangian. Ja dalapm atinya. Dah barinsi’ ingenya, nyangko turutn. Ia maba apa’nya pulakng ka’ tumpuk.

Dah atakng ka tumpuk, apa’nya maba nyangko balajar bakayo. “ dirik sangkarumangan ampagi “ janya bakatan ka nyangko. Nyangko si kateleanan repo-repo maan ka kamao’an apa’nya ngian.

Dah gumare’ abut, santak mantaari maba ayukng-ayukngnya. Nang badama catek pak caneng, bias pak rega, guranikng, man pak lonos. “ ampagi dirik bakayo “ ja santak mantaari bakata ka catek pak caneng.. Catek pak caneng repo dimaba bakayo koa. Ia maba ayukng-ayukngya uga’.

Dah alapm ari, santak mantaari man nyangko dah bakamas. Nya nongkekng otot ( lea tingkalangk, yak nampat kapala ), bangkiraburayakng man tangkitn. Atakng ka tamat sangkarumengan koa, nya natak buluh bala nang ayak batis. Sakali nyintak, buluh bala koa putus. “ nyangko, kao putusatn buluh bala ngian “ ja apaknya nelek nyangko. Nyangko nyintak tangkitnya, putus ugak buluh bala koa. Apaknya ngelengan kapala agi’. O.. Kadek leakoa, diri’ singkubangan. Jakatanya ka nyangko. Nyalima nyingkubakngi sunge nang ayak. Nya ampat, kateleatn inak sampe nyingkubakngi sunge koa. Nyangko, sakali nyingkubakng, sampe ka subarang sunge.

“ kade’ leakoa, talu ari talu malam agik diri’ ba lima ngayo ka timpurukng pasuk, ka lamak bagelah, ka akar inak ditatas, ka rabukng na disempok. “ ja santak mantaari ka ayukng-ayukngya.

Dah samak ari nang dinantuatn koa, nya lima manjoat padupuh man mato’ batalo’. Dah siakng abut, jakata santak mantaari “ diri’ ampus “. Nya lima ampus, batuna’-tuna’an. Nele pamainan apaknya, nyangko batol-batol mao’ nele’atna’ ka jagoatnnya ka na’ apaknya man ayukng-ayukngnya. Ia nyangi’ik talo’, nya macahatn ka tomokngnya. Ia babatak sakit parut ka apaknya. “ aku ina’ ampusa’, ampus ma’an kita’ boh. Aku ampeatn sakit parut kaja bariha’. Aku nunggu ka padupuh maan “ janya. Nyangko nyangi’i’ parutnya, nya nelek dipaknya lubakng tomokng nyangko badarah, balander.
“ o..kadek lea koa kao ina’ baguna. Kade’ lea ian, kami barampat nang ampus “ ja apa’nya.

Nya ampat ampus, bajalatn bairihatn. Nele’ da’ paknya dah barangkat, sakali nyingkubakng nyangko dah sampe ka tampat nang dinuju apaknya man ayukng-ayukngya. Ia nyancakng kayo. Abis nya nyancakng, nya ngicakng kapala nang aya-aya’. Nya ningalatn manyak kapala nang enek-enek aya’ guminting. Ia nangkot agik, pulakng ka padupuh.

Inak lama, apaknya atakng ka tumpuk nang maok dikayo. Dinyanele’ batuma’engan bangke. Nya ngukus kapala-kapala.

Nyangko manjoat diri’nya bagurikng-gurikng agik ka padukuh laka’ nyancakng kayo.

Laka’ ngukus kapala kayo, apa’nya pulakng ka padukuh.
“ koa tele’, inak tauba’ dikami kapala. Kao inak baguletek “ ja kata apa’nya ka nyangko.
“ o.. Nang aya’-aya’ kamae ? “ ja nyangko ka paknya.
“ antah kamae. Ngian ihanya nang kami namu “ ja catek pak caneng.
“ nu’ ku ian. Kapala pangalokngnya. Tele’lah, aya’-aya’ kan ? Ja nyangko. Kita’ dah motek lalaku ngayo…
Nya ampat mangap. Supe’ dinohoi’ nyangko.
“ ampeatn, diri’ pulakng ka tumpuk. Aku maok ngicakng uwe’ku ka dunia. Kadek kita’ bai’, ampeatn uga’ diri’ menak bakayo “ ja nyangko nele’ apa’nya. Apa’nya ina’ badimauh, ia gali’ ka’ nyangko.

Dah atakng ka tumpuk, nyangko babatak ka uweknya. Ia maok maba’a’ uwe’nya pulakng ka dunia talino. Uweknya mao’ ma’an. Dah alapm abut, nya dua turutn kadunia. Nyangko man uwenya lea talino agik.

****

Ka’ Pakana are’ ada idup Ne’ Ragen, dua laki bini. Bininya koa ina’ di tau’an damanya. Leakoa ihannya ja urakng nang pane pane.
Urakng tuha nang dua eko’ koa ugu’, ina’ baranak. Karaja Ne’ Ragen sa’ari arinya koa na’ ahe lain maranso, ngila’. Gumare’ sote’ ia ngila’ ka’babah kayu ara. Nya nangar ada suara kamuda’ ngeak ka’ pucuk kayu ara tadi.
Lalu nyanaringahatn tangis nang koa, nele’ ka’babah ka’pucuk urakng tuha koa. Rupanya kamuda’ koa anak urakng nang mati buju kadalapm pasira’. Kamuda’ koa mulakng idup agi’. Ada ada mao’ gali’a’ Ne’ Ragen tadi. Leanya kasih atinya nangar tangis kamuda’ koa.
“Iu……”Janya ”au’nya kamuda’ talino mulakng idup”
Badelnya nyangaranan ka’ tanah. Nya taiki’ kayu ara tadi. Nya nele’ sasidinya ihan kamuda’ nang koa gilabut gilabut. Lalu nyana’ap nyanurunan, nyangincakng pulakng, nyamihara ba bininya. Lama lama kamuda’ tadi nyanalah, nyanamai’ Do’akng. Dah cukup umurnya, iapun dimalak. Laka’ Babalak ngian Do’akng balala’ talu ari talu malapm. Koa ihanya adat Babalak : ia nana’ mulih bajalatn ka’mae mae, didalapm talu ari agi’ uga’ ia nana’ mulih makatn laok sial lea : pilanuk, kijakng, ganye, kambing, man sapi.
Kabatolatn ka’ talu arinya ataknglah pamujakng Laut Pakana ka’ rumahnya. Ne’ Do’akng pun masatni’ ia.
“Pamujaknga, aku madah kita’, kade’ lapar basuman maan ka’ dapur diri’ dikoa. Tapi ame nyuman kambing ato sapi. Kade’ nyumana’ jukut koa baik kita’ nyuman ka’ dapur lain. Kade’ bai’ ngasi’atn kataku ngian, awas me kita’, subali aku.
Ahe ihan me, Laut koa sidi bai’ ngasi’atn kata Do’akng. Tarus nyanyuman dendeng kambingnya dikoa. Pula’ Do’akng tidur babantal, batngkitn baransah, basumpit ipuh.
Aaah, ampahe waktu ia babuka’ nyida tatele’ ia ka’ Laut tadi, dah jadi kambing. Lupa atinya sabantar. Nyanyujut tangkitnnya, lalu nyamolak tage’ kambing koa. Lah bagi koa, dah putus unang tage’nyu kambinga. Tapi koa ihan, buke’ aku munuha’ talino Jubata’a, ga’ aku munuh laok. Ame ia madi’ mangka’ basalah babangkawar ka’ aku, karana ia dah mati di janji, di untukngnya.
Pamujakng tadi dah mati. Jaji nyamatakatn ka’ bangsa urakng tuhanya, ka’ kamar kapalanya, ia koa dah mati, ampakoa subur. Dah diuntung, dijanjinya koa.
Laka’ koa Ne’ Do’akng minta balajara’, bajalatna’ laki ka’ apa’nya. Minta’ dipanjoatatn kapoa’ bagambar, baju marote, otot baukir, jabakng, sumpit, man tangkitn. Apa’nya ngian mai’atnnya doho’. Lama lama nyanyuruhatn unang.
Sote’ ari nyanyiapatn bahatanya. Ari kadua ia mato’, minta barayukng man Kamang Nyangko, Kamang Lejak, man Kamang Nyado. Ahe ihan me, sidi gagas pamatak rasinya, pamadah pato’nya. Dadi alapm alapm ia ampus ngayo. Antah ka’ mae abut nang mao’nyanuju, saga’ bajalatn ia samao’ mao’ pahanya.
Atakng ka’ udas, duduk sabantar ia badokong. Manjoat jukut diampa’nya, nyarapaatn ka’ tajur, ka’gantekng,ka’ kayu nang aya’ , ka’bukit nang tingi, leanya bapadah bapadah, babatak ka’ Nyangko, ka’ kamang.
Na’ lama nyanangar notok muis ka’ udas nang koa. Ne’ Do’akng pun nyeok talu kali. Muis koa baturunani’ ka babah ngaggoi’ seok Do’akng. Ahe samak man ia muis koa mangka’ karasek, Ne’ Do’akng narik sumpitnya, nyanujuatn ka’ muis nang seko’ koa. Nape’-nape’atn ditapok muis koa mati lentakng lentakng. Sabantar koa uga’ atakng talu urakng, seko’ seko’nya bakata “aku nang nyumpitnya…!”
Tapi sae nang banar?
“ Kade’ leakoa, baparagaatn baik baik diri’ ampat madi’. Ampeatn Do’akng doho’ nang ampu’nya dosanyian.”, ja Bujakng Nyangko.
Lalu nya talu bajanji, “ ampagi alapm alapm diri’ ampat baanti’atn ka’ saka tumuk ampat. Kade’ ada nangar tariu tujuh kali, seok tujuh kali, man nguik tujuh kali, da’ gaceh atakng. Ari koa diri’ bajalatn barrage ngayo ka’ Timpurukng Pasuk, ka’ Lama’ Bagenakng, ka’ Jongong, Tanuk Tagukng, Dapeh Marada’i. ”
Ampagi alapmnya kadangaratn lea janji nang tumare’. Do’akng bakamas ampusa’ namui’a’ ayukngnya nang talu eko’ tumare’. Atakng dikoa, nya ampat madi’ ampus ka’ pangayoatn. Talu ari lamanya bajalatn, atakng uga’ ia ka’ uma urakng musuhnya. Dikoa nyanele’ rami urakng ka’ uma ale’atn.
Ka’ antara urakng nang balale’ tadi koa ada seko’ pamaliatn nang pane ngalumpat bangke, ngalamputn sengat. Ahe ba agi’nya, nya ampat munuhi’ urakng ka’ koa. Cuma kapala pamaliatn tadi nang dingincakng.
Dianlah Kamang ngajari’ adat bakayo. Do’akng dimasatn “ Sanape’ tama’ ka’ rumah, ame ditaikatn ka’ tanga’ pangarokng. Taikatn ka’ ujukng pante. Tari’atn dikoa, ame tama’ ka’ tinga’atn, nyorot sumpayatn. Kade’ naika’ didi jauh tariu, nyeok, man nguik/nguku tujuh kali.
Dianse’ timaga, diamparatn bide, ditungkutn kulita, didiriatn jampa nang balakar canang tampat maduduka’ gantongan nang dinoret nangko’ noret uga’ sabuah gantongan. Do’akng ngikuti’ jakata Kamang tadi, tapi Nyangko lupa man tampat amali’ , ia nari nyorot babah sumpayatn. Lalu lentakng lentakng ia mati. Bangkenya ngian Do’akng mihara sa’ari samalam, baru’ nyanyubur.
Dianlah Kamang ngajari’ bapantak. Leakoa ihan janya, “Taap riti tujuh jangkal, buliatn diukur bariti., dibibis ba sabungan calah, ditarah, ame dibalik balik, mulei’ dari kapala turutn ka’paha. Sabungan calah seko’ iso’ salamar, lagor sababak, pahat, baliukng, pangorek, babotn saloneng, samua ngian pangkaras bapantak.
Ahe ihan me, pulakng basubur, ia tariu sekali ampus natak pantak ja pantaka’ Kamang Nyangko tadi. Dah namu kayu buliatn, pulakng ia ka’ rumahnya, nyanaikatn, nyapanjoat ka’pante talu ari lamanya. Baru’ ditama’an kadalapm rumah gumare’ ari. Nyalangiri’, nyaminyaki’, man nya bare’ makatn. Laka’ nyamare’ makatn, nyanimang pantak tadi, tabah dau kaganjur, naikatn ka’ Ore’ Nyabukng, nari unang basamalaman pantak koa.
Baru’ Ne’ Do’akng nau’an ka’ adat urakng mati. Pulakng ia ka’ rumahnya, nya mare’ nau’an apa’nya adat urakng mati ngian.
Lama lama mati uga’ apa’nya ngian, jukut dah tuha. Nya nabo’ unang Kamang Nyado, “bisa ge’ ina’ talino dipantaki’?”
“ Bisa adatnya ngian sama baadat Kamang Nyangko”, ja Nyado. Lalu pulakng Do’akng manjoata’ pantak pa’nya. Laka’ nyangaraja pantak tadi, nyangalangiri’, nyaminyaki’, nyamare’ makatn, nya nimang uga’ lea Nyangko. Lalu nari ngakeser pantak pa’nya tadi ngian basamalaman. Kasih unang bini Ne’ Ragen tadi nele’ pantak lakinya nari ngakeser, lalu nya naap, nyangapakng, laka’ uunang pantak koa nari. Koalah sampe ampeatn pantak nana’ bisa nari agi’.
Nyian ihanya asal mulanya urakng Darat bapantak. Jakatanya Lumpat di Nyangko, Kamang Lejak, man Kamang Nyado, turutn ka’ Ne’ Ragen, Ne’ Do’akng sampe ka’ diri’, nang masih dimake sampe ampeatn.